CLUBS DE LECTURA 2025-2026

 Neste curso os clubs de lectura do Eusebio son variados e con lecturas e actividades ben diversas.

-Club de lectura de música tradicional de 1º a 3º ESO

-Club de lectura de escrita creativa en 1º ESO

-Club de lectura en 2º ESO

-Club de lectura de igualdade en 3º ESO

-Club de lectura de 4º ESO

-Club de lectura de bacharelato

-Club de lectura de adultas/os

Participaron nas seguintes actividades conxuntas.

-Acto homenaxe a Castelao o 19/12/2025, con lecturas, actuación das cantareiras e proxección do filme Antes de Nós.

-Acto homenaxe a Begoña Caamaño o 15/05/2026, con lecturas e actuación das cantareiras.

-Obradoiro de estampación na editorial Manchea. Os días 4 e 8 do mes de maio, no cal realizaron as súas propias creacións.

 

Medios de difusión de actividades e materiais:

-Blog do Club de Lectura Libros Abertos

https://librosabertos.blogspot.com/

-Páxina web IES P. Eusebio da Guarda

https://www.edu.xunta.gal/centros/ieseusebioguarda/

-Revista do centro, O Caramanchón nº 2, versión impresa e dixital

https://drive.google.com/file/d/1aogllgAyzZQL49EIs71nig_E2jIsYbPP/view?usp=drive_web

DESPEDIDA E VACACIÓNS!!!

Despedimos o curso cuns agasallos ben merecidos para as e os participantes nos clubs de lectura. Vémonos de novo en setembro.

Bo verán!!!

DÍAS DA POESÍA E DO TEATRO

O alumnado dos clubs de lectura de 2º bach e 3º ESO celebrou durante o mes de marzo os días da poesía e do teatro. En 2º bach realizaron un recital a varias voces e en varios idiomas cunha escolma de poemas realizada por eles/as mesmos/as. Despois elaboraron unha exposición coas obras escollidas. 

https://www.canva.com/design/DAGi7aLVXb8/B4htTS1mSMNHuLmVEgM8CA/edit

Pola súa parte, o alumnado de 3º ESO dramatizou unha fermosa cantiga de amigo galego-portuguesa dialogada, de Martín de Padrozelos, unha conversa de reconciliación entre unha parella de namorados.

https://drive.google.com/drive/u/2/my-drive

CLUB DE LECTURA DE POESÍA ORAL E MÚSICA TRADICIONAL

 

A raíz do obradoiro de música e canto tradicional desenvolvido polo departamento de Lingua Galega e Literatura nos recreos da semana das Letras Galegas, formouse un grupo de 8 rapazas interesadas na nosa música e canto, e por propia iniciativa comezaron a reunirse baixo a coordinación da profesora Dulce Fernández Graña nos primeiros recreos dos xoves no salón de actos. Moitas delas van a clase de pandeireta e canto en Xacarandaina, e con moita alegría xúntanse para cantar, tocar, aturuxar e aprender novas coplas.

Foi pouco tempo, mais puxeron en común o seu repertorio, con xotas, maneos, muiñeiras e pasodobres, aprenderon algunha canción máis e iniciaron un proxecto de interpretación das pezas tradicionais da obra de Castelao Os vellos non deben de namorarse, que terá que ser o curso vindeiro. 

Boas vacacións!!!

CORRELINGUA

                

Varios dos nosos clubs de lectura participaron no Correlingua para defender e promover o uso da lingua galega xunto a moitos outros centros educativos da bisbarra coruñesa. Aquí podemos ver algunhas das pancartas que realizaron.

BIBLIOTECAS SOLIDARIAS

O club de lectura de 3º ESO E colaborou na biblioteca no programa Bibliotecas Solidarias. Aprenderon moito sobre a biblioteca e tiveron a oportunidade de presentala ao alumnado do IES Monte das Moas que nos veu visitar. 

En canto á xestión e dinamización da biblioteca, procedeuse á ordenación dos volumes nos andeis, a mellorar a distribución da sección de Banda Deseñada e a organizar unha exposición de materiais bio-bibliográficos sobre Johán Vicente Viqueira, que fora profesor do noso instituto, con motivo do seu centenario.

Un estupendo recoñecemento para rematar o curso!

CLUB DE LECTURA DE CONTACONTOS DE 3º ESO

 

Con alumnado de 3º da ESO, as profesoras Cristina Conde e Sabela Prieto do departamento de Lingua Castelá e Literatura, levaron a cabo un obradoiro de contacontos no que achegaron o alumnado ás técnicas da narración oral, á arte dos contacontos e ás súas posibilidades, para achegar ao alumnado a lectura dun xeito entretido, co obxectivo de conseguir un produto final. Os textos lidos foron materiais do fondo da biblioteca do centro.

Xuntouse un grupo de doce alumnas no recreo dos martes e leron contos, tanto clásicos como modernos, reflexionaron sobre a ensinanza dos mesmos e fixemos lecturas teatralizadas.

Como se fixo nos dous cursos anteriores, a idea era levar os contos preparados aos colexios da contorna pero, por motivos alleos á nosa vontade este curso non puidemos facelo. Este produto final queda pendente para o seguinte curso escolar.

Houbo un obradoiro específico de dúas horas de duración con Alba Peñasco, auxiliar de biblioteca infantil, especialista na realización de contacontos e profesora na Facultade de Educación, que deu a coñecer os diferentes xeitos de interpretar obras e contos para un público infantil.

A valoración do club de lectura foi moi positiva e queda constancia de que tanto o alumnado como as familias opinan o mesmo. Estas lecturas compartidas conseguen que se aprenda moito as unhas das outras e permiten tocar temas fundamentais na adolescencia. As reunións realizadas este ano foron un éxito, polo que o vindeiro curso seguirá o traballo e tratarase de compartir coa comunidade educativa os contos traballados.

No mes de xuño, durante a última semana de clases, o estudantado do club de lectura acudiu a unha actividade complementaria na Sede Afundación para participar na experiencia inmersiva de realidade mixta Hábitats. Natureza estendida.