Avanzamos nas lecturas

 As reunións do club de lectura de 4º ESO e 1º Bach favorecen o intercambio de opinións, a expresión dos gustos persoais en liberdade e a inesgotable aprendizaxe literaria. Tanto o mundo futurista de Cobiza como a reflexión sobre a identidade de 22 segundos permítennos integrarnos na trama das novelas e sentirnos parte delas. Así mesmo suscitamos o sentido crítico comentando aqueles aspectos que nos parecen mellorables, e... quen sabe? Quizais practicando para cando escribamos as nosas propias novelas!

Cobiza e 22 segundos

No club de lectura de bacharelato e 4º ESO  estamos descubrindo mundos novos e diversos, da man de María Reimóndez e Eva Mejuto.  

Horarios das reunións dos clubs 2022-2023

 

Colaboración coa biblioteca municipal infantil e xuvenil

Recentemente recibimos a visita das bibliotecarias da Biblioteca municipal infantil e xuvenil Beti e Lupe, que viñeron coñecer a nosa biblioteca e estudar connosco posibles actividades colaborativas entre os clubs de lectura. A xuntanza deu moi bos resultados, foi o punto de partida dun camiño común que emprendemos moi ilusionadas.

Comeza o club de lectura de 1º ESO

No club de lectura de 1º ESO teñen présa por comezar, e a pesar dos exames xa escvolleron a súa primeira lectura, seguindo as recomendacións da súa profesora Sabela Prieto. 

 

Novo curso, novos clubs!

Este ano comezamos con novos azos dando a benvida aos sete clubs de lectura do Eusebio. 

Nestas datas estamos organizar as xuntanzas, actividades e primeiras lecturas, e en breve mergullarémonos de novo no universo lector. Estes son os nosos clubs:

• 1º ESO, club de lectura en lingua galega, profesora Sabela Prieto González (Departamento de Lingua Castelá e Literatura). Baixo os lemas: “Contra toda discriminación” e “Mulleres na nosa historia”.
• 2º ESO, club de lectura en lingua galega, profesoras Vitoria Sánchez Regueiro (Lingua e Literatura Galegas), Eva Fernández Sieira (Lingua Castelá e Literatura) e Belén Sotelo García (Xeografía e Historia). Baixo os lemas: “Contra toda discriminación” e “Mulleres na nosa historia”.

• 3º ESO, club de lectura en lingua francesa, profesora Mª José Barreiro López (Lingua Francesa). Baixo o lema “Au bonheur de lire”.
• 4º ESO, 1º e 2º Bacharelato, club de lectura en galego, profesora Dulce Fernández Graña (Lingua e Literatura Galegas). Aberto á participación de adultos, profesorado, PAS e familias. Baixo o lema “Racha cos prexuízos, proba en galego”.
• 1º BACH, club de lectura de Ciencias, profesor Manuel Varela Domínguez (Bioloxía).
• ESO, club de lectura para alumnado con NEE e inmigrante, profesora Maite Reigosa Fernández (Orientación Educativa).
• 1º e 2º Bacharelato, ciclos FP, ESA (quenda de tarde), club de lectura en lingua francesa e LGBT, profesor François Davo (Lingua Francesa).

Animádevos a vir. Vémonos na biblio!

Remate do curso

 Para rematar este curso repartimos entre o alumnado participante no club de lectura unhas libretas de agasallo enviadas desde a Asesoría de Bibliotecas escolares. 

O curso que vén repetimos. Bo verán!

Obradoiro de encadernación con Manchea

O luns 13 de xuño tivemos a oportunidade de pasar a tarde aprendendo a encadernar e elaborando un caderno propio con diversas técnicas xaponesas. Tono Galán e Laura Sánchez da editorial Manchea foron guiándonos paso a paso nun obradoiro moi produtivo, e despois de hora e media de traballo quedáronnos uns cadernos superchulos de elaboración artesanal e artística. 

Moitas grazas Manchea, para o curso que vén repetimos!

Segunda constelación, Xemelgos... ou xemelgas?

Cos clubs de lectura de 2º, 3º e 4º ESO e 1º e 2º de BACH estamos a traballar na elaboración da segunda constelación literaria, Xemelgos... ou xemelgas? formada por libros contra a discriminación. Polo momento vai indo ben, pouquiño a pouco.

E xa está rematada. Recóllense nela os libros que fomos lendo arredor da temática contra a discriminación, tanto de xénero como social (Senlleiras, Maxina, Persépole, O diario violeta de Carlota, Os nenos da varíola, As malas mulleres, Denébola a Roxa, O libro do mal amor, A cabeza de Medusa, O inferno de Marta, Masculino singular, Pequena historia da Coruña...). Quedounos moi chula e aprendimos moito.