CLUB DE 4º ESO, A PORTA VIOLETA DE LUÍSA VILLALTA

O club de 4º ESO levou a cabo unha última actividade como homenaxe a Luísa Villalta neste ano en que se lle dedican as Letras Galegas. Decoraron a porta da clase cos seus traballos realizando unha colaxe arredor da súa figura que lles quedou moi chula. 

Animado pola profesora de Lingua Galega e Literatura Dulce Fernández Graña, este club desenvolveu actividades de setembro a xuño no primeiro recreo dos venres arredor de lecturas doadas para facilitar o contacto coa lingua galega de alumnado con dificultades de aprendizaxe e/ou procedente do estranxeiro. Participaron 6 alumnas/os de 4º ESO E, do Programa de Diversificación Curricular.

En colaboración co equipo da biblioteca, e a petición do alumnado do propio club, realizouse unha formación de usuarios para o alumnado de 4º ESO. Ademais este club formouse e colaborou nos labores de xestión e dinamización da biblioteca a través do programa Bibliotecas Solidarias, polo que recibiu un diploma acreditativo de 15 horas de voluntariado como axudantes na biblioteca.

As lecturas realizadas ao longo do curso foron:

-Cuando Hitler robó el conejo rosa, de Judith Kerr (castelán).

-Microalgas. O mundo oculto, de Xulia Pisón (galego).

-Microalgas. O mar de Ardora, de Xulia Pisón (galego).

-Microalgas. Máis alá da terra, de Xulia Pisón (galego).

-Roxín Roxal, a daga do conde, de Manel Cráneo (galego)

-Poemas e A chave do tempo , de Luísa Villalta (galego).

-22 segundos, de Eva Mejuto (galego).

-Pequena historia da Coruña, de Xosé Alfeirán e Xosé Tomás (galego).

-Selección de poesías de Álvaro Cunqueiro (galego) e Bécquer (castelán).

Realizaron moitas actividades, como o obradoiro de Fotopoesía co poeta François Davo, entrevistas ao fotógrafo Gustavo García Roig e á escritora Eva Mejuto, roteiros literarios pola Coruña e Betanzos, participaron no Maratón Solidario Rosalía de Castro, levaron a cabo actividades de escrita creativa polas Letras Galegas en homenaxe a Luísa Villalta, un pódcast no Día da Poesía, a reportaxe Coruñeando sobre a vida cultural coruñesa, publicada na Voz de Galicia dentro do programa Prensa-Escola, pero a mellor de todas foi a excursión final a Betanzos co club do CPI Virxe da Cela de Monfero. 

Con este labor despídense do curso e do instituto. Agasallámoslles un pendrive coas fotos deste ano como lembranza e desexámoslles moita sorte para o futuro. Dámoslles mil grazas pola súa colaboración.

CONTACONTOS NOS COLEXIOS DE PRIMARIA DO CLUB DE LECTURA DE 2º ESO

No Club de Lectura de 2º da ESO participaron oito alumnas, coordinadas pola profesora Sabela Prieto González. As reunións realizáronse nos recreos dos xoves, aínda que, de xeito excepcional, empregamos outros tempos de lecer para preparar certas actividades.

Na primeira avaliación lemos a colección Heartstopper, que conta con cinco tomos de novela gráfica, e tamén lemos as súas secuelas (en castelán).

Na segunda avaliación lemos e compartimos O diario vermello de Carlota, que fala da sexualidade, O diario azul de Carlota, centrado na violencia de xénero, e O diario violeta de Carlota, que nos introduce no feminismo (en galego). Cada unha de nós lía un dos diarios e nas reunións compartiamos o que iamos aprendendo. Ás veces tamén levamos fragmentos que nos chamaran a atención para comentalos entre todas.

Na terceira avaliación lemos dúas obras elixidas pensando no encontro que tivemos co club de lectura de Monfero: No corazón do bosque e O segredo de Al Eume (en galego).

Ao longo do curso realizáronse contacontos en varios CEIP, Franciscanos, Labaca, Concepción Arenal e Eusebio da Guarda. Elaboraron os monicreques e o vestiario necesario para representar e dramatizar os seguintes textos seleccionados dos fondos da biblioteca:

-Os chibos chibóns (galego)

-Orellas de bolboreta (galego)

-A cebra Camila (galego)

-Cerca (galego)

-Once damas atrevidas (castelán)

-Caperucita, de Roahl Dahl (castelán)

-Ricitos de oro, de Roahl Dahl (castelán)

Elaboraron uns marcapáxinas para agasallar ao alumnado do club de lectura de Monfero no encontro en Betanzos.

A valoración do club de lectura foi moi positiva e teño constancia de que tanto o alumnado como as familias opinan o mesmo. Estas lecturas compartidas conseguen que aprendamos moito as unhas das outras e permítennos tocar temas fundamentais na adolescencia. As actividades realizadas este ano foron un éxito, e gustaríame que tivesen continuidade o próximo curso.

CLUB DE BACHARELATO: SENLLEIRAS, CINZA E UN ELEFANTE NA SALA DE ESTAR

Coordinado pola profesora Dulce Fernández Graña, este club contou coa participación de varios grupos: 2 alumnas/os de 1bach con sesións semanais na biblioteca de setembro a xuño, no 2º recreo do luns, realizaron as seguintes lecturas:

-Senlleiras, de Antía Yáñez, Galaxia (galego).

-Cinza, de Xavier Alcalá, ed. (galego).

-Un elefante na sala de estar, de Berta Dávila (galego).

Este grupo asistiu regularmente ás sesións, mostrando moito interese e bo hábito lector. Comentáronse as obras a medida que se ían lendo, relacionando as lecturas coa vida actual e fomentando unha postura crítica de cara á valoración final de cada unha delas. Moi boa actitude.

Por outra banda o alumnado de 2º bach repartiuse en dous grupos, un de 3 alumnas/os e outro de 12. Realizaron as seguintes lecturas e actividades comúns:

-Lectura de poemas variados escollidos por cada un/ha dos fondos da biblioteca (galego, castelán) para a elaboración dun pódcast común polo Día da Poesía.

-Recital poético en soporte pódcast con motivo do Día da Poesía.

-Entrevista ao poeta François Davo con motivo do Día da Poesía, en forma de pódcast.

-Elaboración de reseñas críticas sobre as obras de teatro de Luísa Villalta Concerto dun home só e O paseo das esfinxes.

-Excursión a Betanzos co club de lectura do CPI Virxe da Cela de Monfero. Roteiro Betanzos en feminino, visita ao CIEC e á libraría Biblos.

A valoración é moi positiva, pois o alumnado puxo moito interese tanto nas lecturas realizadas como nas actividades levadas a cabo.

CLUB DE LECTURA DE ADULTAS/OS EN FRANCÉS (NOCTURNO)

 

O profesorado responsable deste club foron Marta Martínez Gregores e François Davo, do Departamento de Francés. Participaron 3 alumnos de 2º Bac nocturno (grupo A e C) e 1 alumna dos ciclos superiores impartidos no centro.

O calendario e horario real de reunións, presenciais ou virtuais foi o seguinte:

1ª reunión durante o mes de outubro para planificar o desenvolvemento do club.

2ª reunión despois do Nadal.

3ª reunión a principios de febreiro para facer un seguimento do club. Tomouse a decisión de cancelalo por falta de asistencia do alumnado (incompatibilidade co Bacharelato e/ou traballo).

Propúxose unha reunión semanal no recreo dos xoves, pero o alumnado soamente asistiu á primeira sesión. Decidimos cancelar o club debido á falta de asistencia (por motivos alleos ao club, como a carga de traballo en 2º Bacharelato ou traballo fóra do centro).

O título que se comezou a ler foi o do cómic Aya de Yopougon, de Marguerite Abouet (francés).

A valoración é negativa xa que foi imposible desenvolver o club de lectura. Sería interesante pensalo quizais para outros niveis como a ESA, con lecturas adaptadas e guiadas, mais resulta moi difícil xa que a maioría do alumnado non ten coñecementos de francés na ESA e parten de cero.

CLUB DE LECTURA DE CIENCIAS

O profesor responsable deste club foi Manuel Varela Domínguez, do Departamento de Bioloxía, Xeoloxía e Ciencias Medioambientais.

Nun principio estaban apuntados 56 alumnos da materia de Bioloxía, Xeoloxía e Ciencias Medioambientais de 1º de bacharelato, mais só se implicaron realizando as lecturas e facendo a actividade 21 alumnos/as.

A actividade estaba pensada para todo o curso académico para realizar individualmente un comentario da súa lectura, nunha data elixida por cada alumno/a nun recreo. Finalmente tíñase pensada unha posta en común a finais de curso. Cada alumno/a lería dous capítulos do libro A orixe das especies, de Charles Darwin. O capítulo 15, común para todo o alumnado, é un resumo do libro que dá unha visión das ideas, e das probas das mesmas que presenta; logo lerían outro capítulo a elixir, sen repetir un capítulo xa lido por otro alumno ata que se cubrísen todos e se volvese a iniciar a rolda de elección.

Finalmente habería unha posta en común de todo alumnado que fixo a actividade na que se recollerían as ideas e os comentarios, que cada un adquiríu coa súa lectura, pero non foi realizada por falta de tempo, xa que os comentarios foron recollidos ao final do curso.

O libro que se leu foi A orixe das especies por medio da selección natural, 6ª edición. Charles Robert Darwin. Dispoñemos de 10 copias do libro en castelán da editorial Austral e unha copia en galego (editada pola USC). Elaboráronse 21 textos escritos con comentarios dun capítulo, de 21 participantes. Recollen a esencia dos capítulos, algúns con máis acerto e outros dun xeito máis xeral.

Non se puido facer un censo das valoracións individuais e dos pros e contras da lecturas, actividade que pode ser proposta para o futuro. Tampouco se puido realizar unha posta en común da lectura final, como estaba recollido na proposta inicial da actividade por falta de tempo, que de cara ao futuro se terá en conta para a anticipala.